Samantekt um þingmál
322. mál á 151. löggjafarþingi.
Ferðamála-, iðnaðar- og nýsköpunarráðherra.
Markmið
Að efla opinberan stuðning við nýsköpun á landinu með sveigjanlegu stuðningskerfi, sterkum tengslum við háskólasamfélag, atvinnulíf og hagaðila og áherslu á nýsköpun á landsbyggðinni. Að skýra ábyrgð, einfalda verklag og forgangsraða opinberum stuðningi og þjónustu við atvinnulífið.
Helstu breytingar og nýjungar
Með frumvarpinu er Nýsköpunarmiðstöð Íslands lögð niður í núverandi mynd í samræmi við markmið nýsköpunarstefnu um forgangsröðun verkefna í þágu nýsköpunarumhverfis á Íslandi og verkefni stofnunarinnar endurskipulögð og flutt annað eftir því sem við á. Lagt er til að stofnað verði tæknisetur í formi óhagnaðardrifins einkahlutafélags í eigu ríkisins. Tæknisetrið mun byggja á grunni Efnis-, líf- og orkutækni, Rannsóknastofu byggingariðnaðarins og þeim hluta Frumkvöðla og fyrirtækja sem snýr að frumkvöðlum og sprotafyrirtækjum á sviði hátækni. Lagt er upp með að félagið geti tekið við hluta af samstarfsverkefnum og skuldbindingum Nýsköpunarmiðstöðvar, þ.á.m. innlendum og erlendum rannsóknarverkefnum, tækjabúnaði vegna rannsóknar- og prófunarstarfsemi Rannsóknastofu byggingariðnaðarins og starfræki frumkvöðlasetur fyrir fyrirtæki á sviði hátækni, verkfræði, raunvísinda og skyldra greina.
Breytingar á lögum og tengd mál
Um er að ræða ný lög og við gildistöku laganna falla úr gildi lög um opinberan stuðning við tæknirannsóknir, nýsköpun og atvinnuþróun, nr.
75/2007. Við gildistöku laganna verða jafnframt breytingar á lögum um byggingarvörur, nr.
114/2014, lögum um vísitölu byggingarkostnaðar, nr.
42/1987, og lögum um mannvirki, nr.
160/2010.
- Skylt mál: Tækniþróunarsjóður, 321. mál (ferðamála-, iðnaðar- og nýsköpunarráðherra) á 151. þingi (19.11.2020)
Kostnaður og tekjur
Gert er ráð fyrir að kostnaður ríkisins vegna annars vegar lokunar stofnunarinnar og
verkefna hennar sem flytjast í annað form verði 655 milljónir kr. á árinu 2021 þar sem tímabundinn lokunarkostnaður nemur 305 milljónum kr. Gert er ráð fyrir að þessi kostnaður muni rúmast innan útgjaldaramma viðkomandi málefnasviðs atvinnuvega- og nýsköpunarráðuneytisins í fjárlögum og fjármálaáætlun fyrir árin 2021–2025. Frá og með árinu 2022 er gert ráð fyrir að útgjöld muni lækka um 305 milljónir kr. og að afkoma ríkissjóðs batni sem því nemur.
Afgreiðsla
Samþykkt með nokkrum breytingum. Helstu breytingarnar voru þær að ráðherra er heimilt að gera samninga við opinbera aðila eða einkaaðila um framkvæmd ýmissa verkefna á sviði nýsköpunar, s.s. samninga um rekstur stafrænna smiðja; ráðherra skal setja á fót stafræna nýsköpunargátt fyrir upplýsingagjöf um stuðning við nýsköpun og tryggja að ráðgjöf á fyrstu stigum nýsköpunarverkefna sé gjaldfrjáls og aðgengileg hvar sem er á landinu; og ráðherra skal veita sértæka styrki, Lóu – verkefnastyrki, til eflingar nýsköpun á landsbyggðinni.
Aðrar upplýsingar
Síðast breytt 04.06.2021. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.
Um samantektir
Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.
Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.
Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.