Barnaþing sett í Hörpu
Barnaþing var sett í fyrsta sinn í Hörpu síðdegis í dag. Meðal viðstaddra voru forseti Íslands, Guðni Th. Jóhannesson, frú Vigdís Finnbogadóttir, sem er verndari barnaþingsins, ráðherrar, forseti Alþingis, skrifstofustjóri Alþingis auk fjölda annarra góðra gesta.
Frú Vigdís Finnbogadóttir, verndari barnaþings, ásamt ráðherrum, forseta Alþingis og skrifstofustjóra Alþingis.
Barnaþing verður framvegis haldið annað hvert ár. Undirbúningur þingsins var á höndum Salvarar Nordal, umboðsmanns barna, og naut hún og starfsfólk embættisins liðsinnis fjölda barna við það verkefni.
Ungir kynnar við setningu barnaþings.
Forseti Íslands ávarpaði þingið og ráðherrar litu um öxl til bernskuára sinna við góðar undirtektir viðstaddra. Hinir fullorðnu verða ekki lengi í fyrrirúmi á þinginu því að það er fyrst og fremst vettvangur barnanna sem sækja það og ræða þar málefni ungu kynslóðarinnar og framtíðarinnar. Um 160 börn taka þátt í þjóðfundi barna 22. nóvember og verða niðurstöður og ályktanir fundarins kynntar ríkisstjórn. Er þeim ætlað að verða hluti af stefnu í málefnum barna.
Ungmenni víðs vegar að fylltu Norðurljósasal Hörpu við setningu barnaþings síðdegis í dag.
