Fundur háskólaráðs í Alþingishúsinu
Háskólaráð hélt fund í Alþingishúsinu í dag í tilefni þess að nú eru liðin 110 ár (og fimm dögum betur) síðan kennsla við Háskóla Íslands hófst í húsakynnum Alþingis. Háskólinn var til húsa við Austurvöll allt þar til starfsemi hans var flutt í nýja aðalbyggingu Háskóla Íslands á Melunum 1940.
Háskóli Íslands var stofnaður á hátíðarfundi á Alþingi 17. júní 1911, þegar 100 ár voru liðin frá fæðingu Jóns Sigurðssonar. Kennsla hófst síðan 2. október á fyrstu hæð Alþingishússins þar sem nú eru þingflokksherbergi, í fjórum deildum; guðfræðideild, heimspekideild, lagadeild og læknadeild.
Háskólaráð ásamt Rögnu Árnadóttur, skrifstofustjóra Alþingis, við þjóðfundarmálverk Gunnlaugs Blöndal í anddyri Alþingishússins.
Kennarastofa var þar sem nú er fundarherbergi forsætisnefndar, en þar fór fundur háskólaráðs fram í dag.
Ljósmyndir © Kristinn Ingvarsson