Fyrsta skóflustunga að nýbyggingu á Alþingisreit tekin þriðjudaginn 4. febrúar
Fyrsta skóflustunga að nýbyggingu á Alþingisreit verður tekin þriðjudaginn 4. febrúar kl. 15. Gert verður hlé á þingfundi á meðan Steingrímur J. Sigfússon, forseti Alþingis, og Ragna Árnadóttir skrifstofustjóri taka fyrstu skóflustunguna. Verktakafyrirtækið Urð og grjót ehf. sér um jarðvegsvinnu en fyrirtækið átti lægsta tilboð í þann verkþátt framkvæmdanna þegar hann var boðinn út sl. haust.
Fyrirtækið S. Helgason átti lægsta tilboð í vinnslu á steinklæðningunni sem verður utan á húsinu en sú vinna var boðin út í ágúst 2019.
Útboð í vinnu við aðalbyggingu og tengiganga verða auglýst í vor og er gert ráð fyrir að uppsteypa hefjist í haust. Verklok eru áætluð í febrúar 2023.
Alþingisreiturinn svonefndi afmarkast af Kirkjustræti, Vonarstræti og Tjarnargötu og nýbyggingin rís á horni Vonarstrætis og Tjarnargötu. Í henni verða m.a. skrifstofur þingmanna, aðstaða þingflokka, fundarherbergi nefnda og skrifstofur starfsmanna þeirra. Þessi starfsemi er nú í leiguhúsnæði við Austurstræti. Byggingin verður um 6.000 fermetrar og í fjármálaáætlun eru áætlaðir 4,4 milljarðar króna til verkefnisins. Framkvæmdasýsla ríkisins hefur umsjón með byggingarframkvæmdunum. Hönnunarsamkeppni um nýbyggingu á Alþingisreitnum var haldin árið 2016. Alls bárust 22 tillögur og hlutu Arkitektar Studio Granda fyrstu verðlaun.
