Tilkynningar

Fyrsta úthlutun úr Barnamenningarsjóði Íslands á degi barnsins

27.5.2019

Alls voru veittir 36 styrkir að heildarupphæð 97,5 milljónir kr. í fyrstu úthlutun úr Barnamenningarsjóði Íslands fyrir árið 2019 við hátíðlega athöfn í Alþingishúsinu á degi barnsins, 26. maí. Katrín Jakobsdóttir forsætisráðherra og Lilja Alfreðsdóttir mennta- og menningarmálaráðherra voru viðstaddar úthlutunina.

Samtals bárust 108 umsóknir og úr þeim valdi fimm manna valnefnd verkefni sem spanna vítt svið lista og eru lýsandi fyrir víðfeðm áhugasvið barna og ungmenna sem og gróskumikið menningarstarf um land allt.

Barnamenningarsjóður Íslands var stofnaður í tilefni af aldarafmæli fullveldisins í samræmi við ályktun Alþingis á hátíðarfundi 18. júlí 2018 og er átaksverkefni til fimm ára. Hlutverk sjóðsins er að fjármagna og styðja við fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi. Í starfi sjóðsins er m.a. horft til áherslu menningarstefnu um samstarf stofnana, skóla, félagasamtaka og einstaklinga, ásamt því markmiði að jafna aðgengi barna og ungmenna að fjölbreyttum og vönduðum listviðburðum óháð búsetu og efnahag.

Á vef Stjórnarráðsins má sjá lista yfir þau verkefni sem hlutu styrki úr Barnamenningarsjóði Íslands fyrir árið 2019.

Barnamenningarsjodur_uthlutun_2019

Ljósmynd / Sigurjón Ragnar
Styrkþegar Barnamenningarsjóðs ásamt forsætisráðherra og mennta- og menningarmálaráðherra.