Bein útsending frá fundi velferðarnefndar með fulltrúum ungmennaráða 4. febrúar
Velferðarnefnd Alþingis heldur opinn fund miðvikudaginn 4. febrúar 2015 kl. 10 í tilefni af 25 ára afmæli samnings Sameinuðu þjóðanna um réttindi barnsins. Á fundinn koma átta ungmenni á aldrinum 14–18 ára úr ungmennaráðum umboðsmanns barna, Barnaheilla – Save the Children á Íslandi og UNICEF á Íslandi. Umræðuefni fundarins verða meðal annars þátttaka og réttindi barna, skólakerfið og menntun, og velferðarmál. Ungmennin verða með stuttar framsögur um hvert umræðuefni og eiga í kjölfarið skoðanaskipti við þingmenn. Bein útsending verður frá fundinum.
Fundurinn verður haldinn í húsnæði nefndasviðs Alþingis í Austurstræti 8–10 og verður opinn fulltrúum fjölmiðla og almenningi meðan húsrúm leyfir.
Umræðuefni og gestir fundarins:
1. Þátttaka og réttindi barna- Sara Mansour, formaður ungmennaráðs UNICEF, fjallar um barnasáttmála Sameinuðu þjóðanna og nauðsyn þess að kynna hann vel.
- Einar Freyr Bergsson, ungmennaráði UNICEF, fjallar um 12. grein barnasáttmálans og mikilvægi þess að fullorðnir hlusti á börn og ungmenni.
- María Fema Wathne, ungmennaráði umboðsmanns barna, fjallar um að færa þurfi skólakerfið nær nútímanum, m.a. um þörf fyrir meiri áherslu á hagnýtt nám.
- Lilja Hrönn Önnu–Hrannarsdóttir, ungmennaráði umboðsmanns barna, fjallar um sérkennslu í leik- og grunnskólum og að tryggja þurfi að öll börn fái skólamáltíðir burtséð frá fjárhag foreldra.
- Anna Ólöf Jansdóttir, ungmennaráði UNICEF, fjallar um ójafna stöðu íslenskra barna og hvernig fátækt getur dregið úr möguleikum barna til náms og tómstunda.
- Nóni Sær Ásgeirsson, ungmennaráði Barnaheilla – Save the Children á Íslandi, fjallar um hversu mikið vanti upp á fræðslu um fatlanir fyrir umsjónarmenn, kennara og börn.
- Ingibjörg Ragnheiður Linnet, ungmennaráði Barnaheilla – Save the Children á Íslandi, fjallar um geðheilbrigðismál og ríka þörf á úrbótum gagnvart börnum.
- Herdís Ágústa Linnet, formaður ungmennaráðs Barnaheilla – Save the Children á Íslandi, fjallar um birtingarmyndir ofbeldis gegn börnum og mikilvægi forvarna.