Tilkynningar

Nýir talsmenn barna á Alþingi

22.11.2022

Undirritun yfirlýsingar talsmanna barna á Alþingi fór fram í Alþingishúsinu í dag. Þingmenn léku sér saman og hétu því að tala fyrir hagsmunum barna.

Þingmenn úr öllum stjórnmálaflokkum gerðust talsmenn barna á Alþingi í dag. Þeir undirrituðu yfirlýsingu þess efnis að þeir skuldbindi sig til að hafa Barnasáttmála Sameinuðu þjóðanna að leiðarljósi í störfum sínum á þinginu, leitist við að tileinka sér barnvæn sjónarmið og hafa hagsmuni barna að leiðarljósi. Birgir Ármannsson, forseti Alþingis, var einnig viðstaddur og tók þátt þegar þingmönnum var boðið að leika sér saman í Lego. Hver þingmaður tók með sér lego-kall og kubba til áminningar um hlutverkið sem hann tekur nú að sér og sinnir út kjörtímabilið.
Þáttur í undirbúningi fyrir hlutverkið var að sækja fræðslu barna og ungmenna um mannréttindi barna og Barnasáttmálann og um það hvernig hann getur nýst við ákvarðanatöku og stefnumótun.

„Ungmennin spurðu okkur krefjandi spurninga um málefnin sem skipta þau máli. Um geðheilbrigði, loftslagsmál, stafrænt ofbeldi og lýðræði,“ sagði Hafdís Hrönn Hafsteinsdóttir, þingmaður Framsóknarflokksins og nýr talsmaður barna á Alþingi. Á viðburðinum fyrr í dag lýsti Hafdís fræðslunni sem þingmenn fengu og sagðist hafa lært að þegar kemur að málefnum barna ættu fullorðin að hlusta meira og tala minna.

Þetta er í fjórða sinn sem talsmenn barna á Alþingi eru skipaðir og er verkefnið samstarf Barnaréttindavaktarinnar, óformlegum vettvangi níu félagasamtaka sem vinna að réttindum barna á Íslandi. Oddný Harðardóttir, þingmaður Samfylkingarinnar, hefur verið í hlutverki talsmanns barna frá árinu 2017 og brýndi hún þingmennina til þess að beita sér fyrir réttindum barna og taka sér til fyrirmyndar Pál Val Björnsson, fyrrum þingmann, sem hlaut Barnaréttindaverðlaun ungmennaráða árið 2016 fyrir störf sín á Alþingi.

20221122_11401120221122_11430920221122_115719

Hver stjórnmálaflokkur tilnefnir einn aðalmann og einn varamann. Eftirtaldir þingmenn gerast í dag talsmenn barna á yfirstandandi þingi:

Flokkur fólksins

Aðalmaður: Ásthildur Lóa Þórsdóttir
Varamaður: Guðmundur Ingi Kristinsson

Framsóknarflokkur

Aðalmaður: Hafdís Hrönn Hafsteinsdóttir
Varamaður: Ágúst Bjarni Garðarsson

Miðflokkur

Aðalmaður: Bergþór Ólason
Varamaður: Anna Kolbrún Árnadóttir

Píratar

Aðalmaður: Gísli Rafn Ólafsson
Varamaður: Arndís Anna Kristínardóttir Gunnarsdóttir

Samfylking

Aðalmaður: Oddný G. Harðardóttir
Varamaður: Jóhann Páll Jóhannsson

Sjálfstæðisflokkur

Aðalmaður: Diljá Mist Einarsdóttir
Varamaður: Vilhjálmur Árnason

Viðreisn

Aðalmaður: Þorbjörg Sigríður Gunnlaugsdóttir
Varamaður: Sigmar Guðmundsson

Vinstri græn

Aðalmaður: Bjarkey Olsen Gunnarsdóttir
Varamaður: Orri Páll Jóhannsson

Barnaréttindavaktin stendur að verkefninu Talsmenn barna á Alþingi til að tryggja börnum málsvara á Alþingi.
Barnaréttindavaktin er óformlegur samstarfsvettvangur félagasamtaka sem öll starfa að málefnum barna, um bætt réttindi þeirra.

Að Barnaréttindavaktinni standa eftirtalin félagasamtök: Barnaheill – Save the Children á Íslandi, Heimili og skóli, Mannréttindaskrifstofa Íslands, Rauði krossinn, Samfés, Ungmennafélag Íslands,  UNICEF á Íslandi, Þroskahjálp og Öryrkjabandalag Íslands.