Tilkynningar

Rafhjól til reynslu

18.10.2019

Alþingi hefur fengið lánuð tvö rafmagnsreiðhjól til reynslu í tvær vikur. Þingmenn og starfsmenn skrifstofunnar geta fengið hjólin lánuð í lengri og skemmri ferðir. Tilgangurinn er að hvetja til notkunar á reiðhjólum og kanna grundvöll fyrir því að þingið kaupi rafhjól til útlána.

Alþingi tekur þátt í verkefninu Græn skref í ríkisrekstri og í því felst m.a. að hvetja fólk til að nota umhverfisvæna samgöngumáta til og frá vinnu og á vinnutíma, hvort heldur er í stuttar vinnutengdar ferðir eða skottúra í einkaerindum.

SJS-og-RA-profa-rafhjol-2

Steingrímur J. Sigfússon, forseti Alþingis, og Ragna Árnadóttir, skrifstofustjóri Alþingis, taka rafmagnsreiðhjól og -hlaupahjól til kostanna. Þingverðir hafa um nokkurt skeið notað rafmagnshlaupahjól í sendiferðir.