Tilkynningar

Umhverfisvænna Alþingi

30.1.2019

Althingi_sodav

Alþingi fékk í október 2018 viðurkenningu verkefnisins Græn skref í ríkisrekstri fyrir innleiðingu á fyrsta Græna skrefinu. Með aukinni umhverfisvitund og innleiðingu aðgerða í umhverfismálum hafa ýmsar breytingar orðið sem gera Alþingi að umhverfisvænni vinnustað. Grænu skrefin eru í hópi ábyrgðarverkefna Umhverfisstofnunar. Nokkrar jákvæðar breytingar sem orðið hafa frá því verkefnið hófst:

Innkaup á sódavatni í einnota plastflöskum hafa dregist saman um 87%. Þingmenn og aðrir starfsmenn nota nú sódavatnsvél og fylla á margnota flöskur sem Alþingi gaf þeim. Þessi aðgerð fækkar einnota plastflöskum um u.þ.b. 2.500 árlega.

Í hverjum mánuði bárust um 40 kg af fjölpósti til Alþingis sem jafngildir um hálfu tonni af pappír árlega. Hluti póstsins var innpakkaður í plast. Forsætisnefnd ákvað að draga úr móttöku á fjölpósti til þingmanna og innleiddi stefnu þess efnis í desember sl. Nú er einungis tekið á móti átta eintökum af skýrslum (einni fyrir hvern þingflokk) og fjórum eintökum af blöðum. Óskað var eftir því að blöðum og skýrslum væri ekki pakkað í plast og að þingmenn fengju í staðinn sendan hlekk á skýrslur. Þess má þó geta að stefnan nær ekki til dagblaða og landshlutablaða/bæjarblaða en áskriftir að þeim eru enn sem komið er óbreyttar. Til að auðvelda aðgang að blöðum var sett upp lesstofa þar sem hægt er að skoða skýrslur og blöð sem berast.

Áhersla var sett á umhverfisvænni samgöngur. Starfsmenn og þingmenn hafa tekið vel í að hjóla og ganga til vinnu. Fleiri koma á hjólum til vinnu og settar voru upp rafmagnshleðslustöðvar fyrir bíla.

Flokkun úrgangs hefur aukist mikið. Árið 2017 var endurvinnsluhlutfall Alþingis 72%.

Althingi_hjol

 

 

 

 



Althingi_bokas

 

 

 

 

Ljósmyndir © Umhverfisstofnun