Nefndasvið

Hlutverk nefndasviðs er að tryggja gæði lagasetningar og veita sérfræðiaðstoð og ráðgjöf til bæði þingnefnda og þingmanna. Starfsfólk sviðsins starfar í tveimur deildum, nefndadeild og alþjóðadeild.

Sérfræðingar nefndadeildar veita fastanefndum faglega aðstoð og ráðgjöf m.a. við yfirferð þingmála, gerð nefndarálita og breytingartillagna, gagna- og upplýsingaöflun og skipulagningu og undirbúning nefndafunda. Sérfræðingar alþjóðadeildar veita alþjóðadeildum faglega aðstoð og ráðgjöf, m.a. á sviði alþjóðamála, við undirbúning fyrir þátttöku í alþjóðlegum fundum, gagna- og upplýsingaöflun og undirbúning fyrir alþjóðlega þingmannafundi sem haldnir eru á Íslandi. Sérfræðingar sviðsins aðstoða þingmenn einnig við vinnslu þingmála og veita þingmönnum lögfræðilega ráðgjöf við gerð frumvarpa og þingsályktunartillagna.

Starfsfólk nefndasviðs hefur aðsetur á 2. og 3. hæð Austurstrætis 8–10, en í því húsi eru jafnframt fundarherbergi fastanefnda þingsins.