Stefnuræða forsætisráðherra og umræður um hana. Virðulegi forseti. Góðir Íslendingar. Stærsta áskorun Íslands hefur alla tíð verið skortur á trausti á stjórn efnahagsmála. Sá skortur hefur átt ríkan þátt í að sveiflur af ýmsu tagi hafa magnast upp að óþörfu og valdið tjóni, bæði fyrir heimili og atvinnulíf. Þetta hefur verið meira og minna saga okkar frá því að við urðum sjálfstæð þjóð. Þessu verðum við að breyta. Það tekur langan tíma að ávinna sér traust en afar skamma stund að glutra því niður aftur. Það er eitt mikilvægasta verkefni þessarar ríkisstjórnar að byggja upp þetta traust. Það gerum við með ábyrgri stjórn efnahagsmála og staðfestu. Traust verður einungis byggt upp með sanngjörnum leikreglum, aga og festu, bæði þegar vel gengur og þegar á móti blæs. Markmið stjórnvalda í efnahagsmálum þurfa að vera skýr og öllum ljós. Það þarf að taka ábyrgð á þeim og hafa þor til að forgangsraða með langtímahagsmuni að leiðarljósi. Ég trúi því að forsendur trúverðugrar efnahagsstefnu á Íslandi séu í meginatriðum þrjár: Öflug verðmætasköpun, sjálfbær rekstur ríkissjóðs og stöðug króna, en trúverðugleiki stöðugrar krónu næst ekki nema hún hvíli á trausti til efnahagsstefnunnar. Án þess trúverðugleika munum við Íslendingar alltaf búa við sveiflur, verðbólgu og háa vexti. Af þessum sökum verður stjórn efnahagsmála alltaf að vera í öndvegi. Það liggur alveg fyrir hvað þarf að gera. Nágrannalöndin hafa öll tekið á sambærilegum vandamálum og náð tökum á sveiflum með ábyrgri stjórn efnahagsmála. Við verðum að þora að setja aga í efnahagsmálum í fyrsta sæti og fjárfesta í stöðugleika til langs tíma. Ríkisstjórn Viðreisnar, Flokks fólksins og Samfylkingarinnar er sammála um þetta grundvallaratriði. Verkefnið er hvorki einfalt né auðvelt. Það er engin ástæða til að draga fjöður yfir það. Við þekkjum öll áskoranir og erfiðleika í eigin daglega lífi eða í rekstri fyrirtækjanna. Við vitum, held ég flest, að stundum þarf að taka erfiðar ákvarðanir til þess að búa í haginn fyrir framtíðina. Rekstur ríkissjóðs er að þessu leyti ekkert frábrugðinn. Við Íslendingar erum í öllum aðalatriðum lánsöm þjóð. Við búum í mjög góðu samfélagi. Við höfum alla burði til að gera það enn betra. Við höfum oft sýnt að við sem þjóð höfum kjarkinn til að taka erfiðar ákvarðanir þegar nauðsyn krefur. Sagan kennir okkur að þá lætur árangurinn ekki á sér standa. Við eigum ekki að sætta okkur við óbreytt ástand sveiflna, mikillar verðbólgu og hárra vaxta. Ég held að ekkert okkar vilji bjóða börnunum okkar upp á óbreytt ástand, áframhald af því sem hefur gilt. Það ætlum við í Viðreisn og þessi ríkisstjórn heldur ekki að gera. Virðulegi forseti. Góðir Íslendingar. Ég og ríkisstjórnin erum öll sannfærð um að stærsta og besta búbótin fyrir almenning og fyrirtæki í landinu sé minni verðbólga og lægri vextir. Hallalaus fjárlög eru langmikilvægasta framlag okkar til þess að gera það að veruleika og byggja um leið forsendur fyrir stöðugleika til framtíðar.