Stefnuræða forsætisráðherra og umræður um hana. Frú forseti. Kæru landsmenn. Húsnæðismarkaðurinn hefur verið á vondum stað og hefur verið það allt of lengi. Við þurfum sameiginlega sýn um hvernig við komumst út úr þessum vítahring þar sem íbúðamarkaður er annaðhvort botnfrosinn eða á bullandi suðu. Það er ótækt að sveitarfélög líti á byggingarland eingöngu sem tekjulind og ýti þannig undir lóðabrask þar sem hver einasta króna er kreist áður en uppbygging á sér stað. Það er ótækt að eitt sveitarfélag geti stöðvað vöxt annars vegna neitunarvalds á svæðisskipulagi eða vaxtamörkum. Það er ótækt að heil hverfi séu í biðstöðu áratugum saman vegna þess að einhver banki eða fjárfestir er að bíða eftir því að fá rétt verð fyrir landið. Það er ótækt að næstu kynslóðir komust ekki inn á íbúðamarkað vegna þess ástands sem skapast hefur síðustu ár og áratugi á ábyrgð og á vakt stjórnmálanna. Það er með öllu ótækt að tíu ár líði frá fyrstu snertingu verkefna við skipulag og þar til búið er að fullklára íbúð til sölu. Uppsveiflur og hrun, uppsveiflur og hrun. Þessu verðum við að breyta og þessu ætlum við að breyta. Við ætlum að tryggja jafnara framboð íbúða og lóða til skemmri tíma og til framtíðar. Íbúðir í takt við þarfir og eftirspurn, íbúðir sem venjulegt fólk hefur efni á að kaupa eða leigja. Við munum einnig leggja fram uppfærða og nýja byggingarreglugerð á þessu þingi. Reglugerðin verður einfölduð úr átján köflum í átta með áherslu á skilvirkni, neytendavernd og gæði. Við munum einnig leggja fram breytingar á skipulagslögum þar sem ferlar verða styttir og neitunarvaldi vegna vaxtamarka eytt. Við höfum nú þegar samið um uppbyggingu á allt að 1.400 íbúðum á ríkislóðum, lóðum sem flestar hafa lengi staðið auðar. Við höfum þegar stigið skref í átt að breytingum á hlutdeildarlánakerfinu sem hefur hjálpað fleiri fyrstu kaupendum en áður. Við höfum skrifað undir fyrstu uppbyggingarsamningana inn í kerfið. Við höfum einnig eflt almenna íbúðakerfið og hækkað stofnframlög til að tryggja uppbyggingu fleiri óhagnaðardrifinna leiguíbúða. Fram undan eru mikilvægar breytingar á húsaleigulögum þar sem við ætlum að banna mánaðarlega vísitölutengingu og breyta líka fyrirkomulagi húsaleigutrygginga. Við munum fara í heildarendurskoðun á húsnæðisstuðningskerfinu svo það styðji betur við þá sem þurfa á því að halda í stað þess að ýta undir frekari hækkanir á húsaleigu. Einnig munum við fara í frekari endurskoðun á almenna íbúðakerfinu þar sem við ætlum að skoða nýtt kaupleiguform. Síðast en ekki síst ætlum við að draga úr vægi verðtryggingar. Verðtryggð lán eru eins og spennitreyja í íslensku samfélagi, meinsemd sem við höfum þurft að búa við allt of lengi. Starfshópur um endurskoðun húsnæðislánakerfisins mun skila af sér niðurstöðu á yfirstandandi þingi og fyrstu skref í að draga úr vægi verðtryggingar verða stigin nú í haust. Það er verk að vinna til að ná jafnvægi á húsnæðismarkaði. Bæði ríki og sveitarfélög, fyrirtæki og almenningur verða að ganga í takt í þeirri vegferð. Kæru landsmenn. Ríkisstjórn Flokks fólksins, Viðreisnar og Samfylkingarinnar er ríkisstjórn almannahagsmuna og mun hér eftir sem hingað til vinna fyrir fólkið í landinu. — Góðar stundir.