fjárlög 2027 Virðulegi forseti. Ég þakka hv. þingmanni fyrir andsvarið. Ég veit ekki alveg hvað ég á að segja um það. Það liggur alveg fyrir að það var mikill halli hér í Covid eins og í öllum þeim löndum sem við berum okkur saman við. En í ofanálag fengum við Reykjaneseldana líka. Mér er til efs að nokkur ríkisstjórn hafi fengið annað eins upp í fangið eins og þau verkefni og það skýrir svo sannarlega hallann. En sem betur fer stóð ríkissjóður það vel að hann þoldi það og þessi ríkisstjórn tekur við góðu búi. Það sem mig langar kannski að spyrja hv. þingmann um, af því að það voru engar beinar spurningar til mín, er í fyrsta lagi: Af hverju lofuðu stjórnarflokkarnir því að hækka ekki skatta fyrir kosningar? Af hverju lofuðu þeir því? Þeir buðu sig fram til þings og vissu alveg stöðu mála. Þeir lofuðu því mjög skýrt að hækka ekki skatta. Af hverju gerðu þeir það? Síðan spyr ég: Telur hv. þingmaður að það sé góð leið til að ná niður verðbólgu að auka skuldir verulega, hækka skatta og gjöld verulega, um 60 milljarða kr. frá því að þessi ríkisstjórn tók við? Er þetta góð leið til að ná niður verðbólgu? Er þetta góð leið til að auka hagvöxt? Það eru þessar þrjár spurningar: Af hverju lofuðuð þið því fyrir kosningar að hækka ekki skatta og telur hv. þingmaður þetta vera leiðina til að auka hagvöxt og leiðina til að minnka verðbólgu?