fjárlög 2027 Virðulegur forseti. Ég þakka hv. þingmanni fyrir ágæta ræðu. Ég vil nota tækifærið og spyrja hv. þingmann í rauninni út í tvennt. Í fyrsta lagi: Hv. þingmaður er í Samfylkingunni, flokki sem lofaði mjög skýrt fyrir kosningar að hækka ekki skatta. Nú er búið að hækka skatta um 60 milljarða á tveimur árum, mestu skattahækkanir sem hafa sést í áratugi. Af hverju lofaði Samfylkingin fyrir síðustu kosningar að hækka ekki skatta? Sömuleiðis sagði formaður flokksins, sem núna er hæstv. forsætisráðherra, að þegar ríkisstjórnir gera lítið til að halda aftur af verðbólgu þá þarf Seðlabankinn að gera meira. Þegar þessi ríkisstjórn tók við voru vextir að lækka en þeir eru búnir að hækka stöðugt síðan. Ég spyr hv. þingmann: Er ríkisstjórnin ekki að gera nóg eða var þetta bara þvæla sem hæstv. forsætisráðherra sagði á síðasta kjörtímabili? Hv. þingmanni hefur orðið tíðrætt um stöðugleikaregluna. Fjármálaráð taldi þetta vera forsendubrest og það þyrfti að lækka útgjaldaþakið, og menn þurftu að líta til þess í sinni álitsgerð, þær breytingar sem ríkisstjórnin gerði á lögum núna síðasta vor. Ég vil spyrja hv. þingmann út í það hvort hann telji hvort menn séu bara yfirhöfuð sammála einhverju sem fjármálaráð sagði í álitsgerð sinni vegna þess að við höfum ekki séð neitt þar. Ekki er komið neitt til móts við þær ábendingar sem þar koma.