fjárlög 2027 Forseti. Ég þakka enn og aftur fyrir andsvör hæstv. fjármálaráðherra. Ég vil benda á að þessi framúrkeyrsla á yfirstandandi ári, þessi hækkun útgjalda umfram það sem áætlað var — það er ekki bara ein ástæðan fyrir henni. Þetta er hækkun á fjölmörgum málefnasviðum hjá ríkinu. Það sem ég hef verið að tala fyrir margoft undanfarinn þingvetur er að það virðist sem svo að ríkisstjórnin sé ekki að taka á þeim málaflokkum og þeim málefnasviðum þar sem útgjöldin hafa verið stjórnlaus á undanförnum árum. Til dæmis eitt sem kom fram í svari við fyrirspurn hv. þm. Nönnu Margrétar Gunnlaugsdóttur: Svo virðist vera sem eftirlit með bótagreiðslum almannatrygginga hafi verið mjög áfátt á undanförnum árum og hafi nánast ekki verið neitt. Ef tekinn er samanburður á milli ára, undanfarinna kannski tíu ára, þá hefur eftirlit með þessum útgjöldum ríkisins, sem eru mjög veigamikill og stór þáttur í útgjöldum ríkisins, hrapað á undanförnum árum. Ég er ekki að segja að það hafi verið rosalega gott áður en það er nánast ekki neitt. Þar er ég að vísa í fyrirspurn sem ég er ekki með þingskjalanúmerið á en var í fréttum, held ég, í gær. Þannig að það er að mörgu að hyggja. Ég get líka bent á að þessi loftslagsmál sem hefur gengið verulega illa að fá einhver svör við í raun og veru og þaðan af síður að fá svör við því hvaða árangur er af öllum þeim fjáraustri sem í þann málaflokk hefur farið. Það hefur ekki gengið vel og hef ég sjálfur verið fremstur í flokki við að spyrja að því. Það hefur ekki gengið vel að fá það rökstutt hver árangur af öllum þessum fjáraustri hefur verið. Það eru margar matarholurnar í fjárlögum ríkisstjórnarinnar.