fjárlög 2027 Frú forseti. Ég vil byrja á að þakka hv. þingmanni kærlega fyrir góðar spurningar. Fyrsti liðurinn í því að ná að greiða niður skuldir er að komast úr þeim fasa að vera að safna skuldum. Nú erum við vonandi að ná endum saman í fjárlögum næsta árs og síðan erum við auðvitað að líta til þess að um leið og það gerist og þjóðarhagur fer vaxandi þá lækka skuldir miðað við þjóðarframleiðslu. En svo má ekki alveg gleyma því að við sölu á Íslandsbanka fór einhver fjárhæð þar til greiðslu skulda, þannig að þetta er allt á réttri leið. Ég vona að hv. þingmenn Sjálfstæðisflokksins sjái það og ræði hlutina eins og þeir eru þannig að við séum ekki að skapa óþarfaverðbólguvæntingar úti í samfélaginu sem eru þá kannski ekki til þess fallnar að við náum niður verðbólgunni í sameiningu. Hvað varðar hækkun skatta, við í Flokki fólksins höfum alltaf sagt og segjum enn: Við viljum ekki skattleggja fátækt. Það er náttúrlega númer eitt, tvö og þrjú og við höfum ekkert farið í grafgötur með það og við höldum það í heiðri og ætlum að stuðla að því. En síðan er það auðvitað með skattlagningar, eins og ég minntist á hér fyrr í umræðunni, hvenær maður er í rauninni að stofna til aukinna skatta. Það er auðvitað þegar menn fara að leggja á ráðin um útgjöld. Þegar menn gerðu það á árum áður, áður en þessi ríkisstjórn gerði sér grein fyrir — og höfðu eflaust ærnar ástæður til, eins og hefur komið fram hér í góðum ræðum stjórnarandstöðunnar, þá voru þeir auðvitað að einhverju marki að boða skattahækkanir síðar, þegar áraði betur. Nú getum við verið sammála um að það árar bara þokkalega vel. Það er ýmislegt sem bendir til þess að við getum náð hér meiri verðmætum út úr sjávarauðlindinni og fleiri þáttum. Ég held að við eigum að vera hóflega bjartsýn á framhaldið og nota það góðæri til að treysta stöðu ríkissjóðs.