fjárlög 2027 Forseti. Ég þakka hv. þm. Ingibjörgu Isaksen fyrir svarið. Ég geri mér grein fyrir því að þingið stendur sig mjög vel í aðhaldi við ríkisstjórnina. En það sem við erum að tala um hér er aðhaldið gagnvart rekstri hins opinbera og við erum sammála um að það má bæta. Ég vil þó taka fram að í langsamlega flestum tilfellum er rekstur ríkissjóðs og rekstur ríkisaðila innan fjárheimilda en þarna eru veikleikar sem ég held að sé mjög mikilvægt að fjárlaganefnd rannsaki sérstaklega og skoði vegna þess að það er á endanum á grunni laga sem samin eru á Alþingi sem þessar glufur opnast. Mig langaði að víkja að tveimur punktum sem hv. þingmaður kom inn á. Í fyrsta lagi talaði hún um niðurskurð til rannsókna og þróunar. Það er ekki rétt. Í fjárlögum er gert ráð fyrir ákveðnu umfangi. Þetta er það sem kalla mætti opinn krana, einn af fjölmörgum í fjárlögum, og það fer einfaldlega eftir eftirspurninni hversu umfangsmikill þessi kostnaður er. Það er einungis verið að uppfæra hann á grundvelli spár Rannís um það hversu umfangsmikill kostnaðurinn verður þannig að þarna er enginn samdráttur. Varðandi LSH held ég að það sé mjög mikilvægt, og það er raunar síðari spurning mín, að við veltum fyrir okkur mjög vandlega ramma opinberra framkvæmda. Það er alveg rétt að þetta verkefni hefur farið fram úr tímaáætlunum. Að hluta til er það vegna þess hversu þung í vöfum þessi verkefni verða vegna reglna sem settar eru hér í þessum sal. Þarna þurfum við að axla ábyrgð. Ég mun síðar á þessu þingi koma fram með frumvarp til laga um fjárfestingar ríkisins sem beinlínis hefur það að markmiði að koma betri aga á þessi verkefni. En við þurfum að huga að fleiru og ég vænti góðs samstarfs við hv. þingmann og hennar kollega um þessar umbætur.