fjárlög 2027 Herra forseti. Ég þakka hæstv. ráðherra fyrir hans seinna andsvar. Einmitt þegar kemur að framkvæmdum og Framkvæmdasýslunni þá bind ég vonir við að þetta frumvarp muni ná utan um það af því að maður heyrir það utan að sér að m.a. barna- og menntamálaráðuneytið sé að leita til sveitarfélaga varðandi uppbyggingu og stækkun verkmenntaskóla því að það treysti hreinlega ekki Framkvæmdasýslunni til að fara í verkefnið. En þegar kemur að opinberum stofnunum og aðhaldi þá getur fjárlaganefnd gert eitt, en svo er líka annað hvað ráðuneytin geta gert og ráðherrarnir geta gert. Við sjáum að hallinn hjá Sjúkratryggingum Íslands er um 12 milljarðar. Hvað er hægt að gera í tengslum við það og koma í veg fyrir það? Og hvernig ætlar ráðuneytið að bregðast við t.d. kjarasamningum lækna þegar við horfum á hallarekstur heilbrigðisstofnana? Er sanngjarnt að saka opinberar stofnanir eins og heilbrigðisstofnanir um hallarekstur þegar ríkið gerir samninga við sérfræðilækna og lækna og mætir ekki kjarasamingunum, þ.e. hækkunum, og þegar gerðir eru leigusamningar eins og fyrir HSN á ákveðnum forsendum en hækkunum ekki mætt þegar kemur að leigusamningum? Það er ýmislegt sem þarf að skoða í þessu og ýmislegt sem hægt er að gera betur því við þurfum líka að vera sanngjörn. Við þurfum að vera með raunhæfar væntingar, raunhæfar áætlanir og þá er auðveldara líka að fylgja þeim eftir, ekki vera með einhverjar vonir og væntingar um að ákveðnar tekjur skili sér, í rauninni áætlanir sem eru jafnvel byggðar á sandi. Við þurfum að vera heiðarleg þegar kemur að þessu og þar getum við í rauninni klárlega unnið saman.