fjárlög 2027 Hæstv. forseti. Mig langar að þakka hv. þm. Höllu Hrund Logadóttur fyrir góða ræðu. Ég verð að segja að ég kann að meta þá nálgun að draga fram það jákvæða auk þess sem þingmaðurinn er hugsi yfir. Ég held að það sé góður bragur á því hér í þessum þingsal að geta rætt málin málefnalega og kosti og galla. Mig langar að spyrja þingmanninn hvað henni finnst um þetta markmið um hallalaus fjárlög. Við höfum auðvitað verið að ræða hér, og það var líka rætt undir umræðu um stefnuræðu forsætisráðherra í gær, að það er ekki auðvelt að stefna að hallalausum fjárlögum. Þetta er í fyrsta sinn sem það gerist í næstum því tíu ár, síðan 2019. Það skiptir auðvitað máli að við hér á Alþingi tryggjum það að við eigum fyrir því sem við eyðum. Ég veit að hv. þingmaður var auðvitað ekki sitjandi á Alþingi í tíð síðustu ríkisstjórnar en það bar á því að það var eytt um efni fram. Ég verð að segja að ég tek undir með hv. þingmanni varðandi áhersluna á heilbrigðismál. Ég tel það mikilvægt. Ég tel mikilvægt að framlínustarfsmönnum sé hlíft þegar kemur að aðhaldskröfu í frumvarpi til fjárlaga. Það hafa ýmiss konar yfirlýsingar verið gefnar út á síðastliðnum árum og áratug varðandi heilbrigðismál. Til að mynda var ég mjög ánægð með kjarasamninga lækna en svo brá mér í brún þegar ekki var til fjármagn fyrir þeim. Það var mikið um ófjármögnuð loforð. Mig langar að spyrja hver afstaða hv. þingmanns er gagnvart hallalausum fjárlögum.