fjárlög 2027 Frú forseti. Ég vil þakka hv. þm. Örnu Láru Jónsdóttur fyrir ágætisandsvar. En í spurningu hv. þingmanns kristallast kannski einmitt hvað stjórnmálaskoðanir okkar eru ólíkar. Það er hægt að ná niður vöxtum og verðbólgu án þess að skattleggja allt í drep. Og ef menn ætla að fara í skattahækkanir — ég tel að menn skattleggi ekki til velsældar, ég held að það séu fá ríki sem hafi gert það — þá þarf að ígrunda þær vel og það þarf að vera fyrirsjáanleiki. Ég er ekki að segja að það eigi að vera engir skattar í velferðarsamfélagi eins og okkar en hér birtast þeir nánast eins og skrattinn úr sauðarleggnum. Jú, jú, það er í fjármálaáætlun, en við verðum að hafa meiri fyrirsjáanleika. Ég vil leggja áherslu á að leysa þann kraft úr læðingi sem býr innra með fólki en ekki hefta það, ekki draga úr hvötum til framkvæmda og athafna eins og skattar gera. Skattar, gjöld, refsingar, þetta er allt til að minnka þessa hegðun. Til dæmis þegar menn keyra of hratt þá eru þeir sektaðir. Til hvers? Til að menn keyri hægar og hætti að keyra of hratt. Það sama á við um skatta. Það að skattleggja eitthvað sérstakt kemur til með að draga úr þeirri hegðun. Auðvitað kann það að vera leið ríkisstjórnarinnar að bara kæla allt með því að skattleggja algjörlega í drep. En ég myndi benda hv. þingmanni á að draga úr umsvifum ríkisins því það eru ríkisútgjöldin sem á endanum skapa bæði verðbólgu og svo aukna vexti í kjölfarið. Ég veit ekki alveg hvort ég svaraði spurningu hv. þingmanns en mögulega get ég svarað henni þá í seinna andsvari.