fjárlög 2027 Frú forseti. Ég vil þakka hv. þingmanni fyrir sitt seinna andsvar en þrátt fyrir mikla einbeitingu náði ég ekki að hlusta mér til gagns þannig að ég fyndi spurningu í andsvarinu. Mig langar því að taka þennan þráð upp aftur. Ég tek undir að auðvitað eigum við að reyna að nýta hlutina vel, almennt í öllu, og hafa öll mál eins skilvirk og hægt er. Ég vil bara hvetja hv. þingmann aftur til að fara inn í sitt bakland í ríkisstjórninni og ræða þetta þar. Hæg eru heimatökin þegar menn eru í meiri hluta á þingi. Þá er hægt að gera það. Það er margoft talað um að ríkisstjórnin sé samhent, menn syngi í sömu tóntegund o.s.frv. Það ætti því að vera auðvelt mál fyrir hv. þingmann að fara áfram með þetta. En þar sem engin spurning var í seinna andsvari hv. þingmanns þá læt ég máli mínu lokið hér, þó að tíminn sé ekki liðinn.