fjárlög 2027 Frú forseti. Ég þakka hv. þingmanni svarið. Þessir 4,7 milljarðar sem eiga að vera í afgang — sem væri nú gott ef myndi rætast — eru samt 0,003% af útgjöldum ríkissjóðs svo að það má ekkert út af bregða til að þetta geti staðist. Mig langaði líka að vekja athygli á einu, því að fjárlög snúast um forgangsröðun og ég var ánægð með þá forgangsröðun að byggja upp hjúkrunarheimili. En af því að hv. þingmaður minntist á leikjafræði þessarar ríkisstjórnar þá olli það mér vonbrigðum að það sé ekki bara hægt að segja hlutina eins og þeir eru. Hæstv. ráðherra, Inga Sæland, hefur komið núna ítrekað í fjölmiðla og sagt að það verði engir biðlistar samkvæmt þeirra áætlun, í lok framkvæmdaáætlunar þessarar ríkisstjórnar. Ef þú skoðar þessa áætlun kemur fram smátt letur, þ.e. smáa letrið sem ríkisstjórnin segir ekki frá, þ.e. það verður enginn á biðlista miðað við markmið ríkisstjórnarinnar árið 2028. Markmið ríkisstjórnarinnar er að 75% aðila séu ekki á biðlista. Þessi framsetning, að segja að enginn verði á biðlista og sleppa því að segja að það verði enginn á biðlista miðað við markmið um að 75% komist að, finnst mér óboðleg. Er það kannski vandamálið, að þau eru hætt að hugsa í raunheimum og eru bara í leikjafræði?