fjárlög 2027 Forseti. Ég þakka hv. þingmanni fyrir mjög áhugaverða og mikilvæga spurningu. Það er alveg rétt að þessir stóru tilfærsluliðir vega langþyngst. Margir af þeim, stærsti parturinn af þeim, eru lögbundnir og þetta er kannski sá hluti sem oft er erfiðast að eiga við. Í fjármálaráðuneytinu á sér hins vegar stað endurmat útgjalda þar sem verið er að fara yfir þessa stóru og þungu málaflokka, ef svo má segja, sem kannski er erfiðara að gera milli fjárlaga. Ég vil kannski gera greinarmun á þeirri ákvörðun okkar að auka upphæð greiðslnanna nú í vor, sem fara inn í almannatryggingakerfið, og síðan því hversu margir eru að fara inn í kerfið. Við ákváðum að fara þá leið. Þarna er hópur af fólki, þeir sem búa oftast við hvað mesta fátækt í örorkubótakerfinu og þeir sem eru á strípuðum almannatryggingagreiðslum, fólk sem situr ekki við kjaraborðið, að fá meiri hækkun í takt við laun en venjulega. En auðvitað hafa allir áhyggjur af því að fólk festist að óþörfu á örorku og ég held að flestir geti tekið undir það. Þess vegna er verið að skoða betur samspil endurhæfingarlífeyriskerfisins og örorkukerfisins og ég held að allir hljóti að geta tekið undir það. Það er lítið upp úr því að hafa til lengri tíma að vera fastur á örorku. Þótt það sé borið saman við atvinnuleysisbótakerfið þá er það samt þannig að einstaklingur sem ratar síðan að lokum út á vinnumarkaðinn er ekki fastur á ígildi lágmarkslauna, eða á lægri launum en lágmarkslaunum, allt sitt líf eins og þeir sem eru á örorkulífeyri eru restina af sínu lífi. Ef ég hefði lengri tíma myndi ég tala um það gat sem hefur skapast í heilbrigðisútgjöldum og heilbrigðismálum hér á landi, sérstaklega eftir óábyrga kjarasamninga, að mínu mati, sem voru gerðir hér tveimur til þremur dögum fyrir síðustu kosningar. Þeir hafa gert það að verkum að Sjúkratryggingar eru að fara marga milljarða á hverju einasta ári fram yfir og heilbrigðisstofnanir margar hverjar skila halla. Ég bíð með það til betri tíma.