fjárlög 2027 Virðulegi forseti. Fjárlög snúast um forgangsröðun, um það hvernig við öflum tekna, hvernig við verjum þeim og ekki síður um hvers konar samfélag við viljum byggja. Eitt af því sem ég fagna sérstaklega í þessu fjárlagafrumvarpi er hækkun á sérstökum skatti á fjármálafyrirtæki. Ég hef lengi talað fyrir hækkun bankaskattsins og ítrekað lagt til á Alþingi að hann yrði aftur færður í tæp 0,4%, eins og hann var áður en fyrri ríkisstjórn ákvað að lækka hann árið 2019. Ef eitthvað er hefði ég viljað sjá okkur hækka þennan skatt enn frekar. En hækkun upp í rúm 0,25% er vissulega skref í rétta átt, sem ég fagna. Þetta snýst fyrst og fremst um sanngjarna skiptingu byrða. Heimilin í landinu hafa fundið rækilega fyrir verðbólgu og háum vöxtum undanfarin ár. Þegar tekist er á við það mikilvæga verkefni að koma jafnvægi á ríkisfjármálin er eðlilegt að breiðari bökin leggi meira af mörkum. Sterk ríkisfjármál snúa ekki síst að öryggi og getu samfélagsins til að takast á við hið óvænta og við gerð fjárlaga þarf stöðugt að hafa í huga að á bak við allar tölur og aðgerðir er fólk. Íslendingar þekkja betur en margar aðrar þjóðir hversu skyndilega aðstæður geta breyst. Atburðirnir í Grindavík og nágrenni hafa nýverið sýnt okkur það með sársaukafullum hætti. Þegar heilt bæjarfélag verður fyrir slíku áfalli verður ríkið að hafa bolmagn til að bregðast við. Ríkið verður að hafa fjárhagslegt svigrúm og búa yfir stjórnkerfi sem getur brugðist hratt við. Þess vegna er mikilvægt að samhliða því að styrkja stöðu ríkissjóðs sé lögð áhersla á aukið áfallaþol samfélagsins og að halda áfram þeirri mikilvægu vinnu sem fram undan er við endurreisn Grindavíkur. Þótt fjárlög snúist vissulega um tölur, tekjur og gjöld, hvernig við forgangsröðum sameiginlegum fjármunum okkar, segja þau líka sögu um hvers konar samfélag við viljum byggja, hvernig við viljum að stjórnvöld vinni fyrir fólkið í landinu. Mig langar því að spyrja hæstv. forsætisráðherra hvernig hún sjái fyrir sér að þær áherslur sem birtast í fjárlagafrumvarpinu á sterkari ríkisfjármál og sanngjarna tekjuöflun geti um leið styrkt getu okkar til að standa með fólki og samfélögum þegar óvænt áföll dynja yfir.