fjárlög 2027 Virðulegur forseti. Smá leiðréttingar. Í fjármálaáætluninni átti fjármagn til viðhalds að fara í 18 milljarða á tímabilinu og ég held að það sé 5,5% niðurskurður til Vegagerðarinnar en ekki 1,6% aukning. Varðandi Göng og brú er ekki króna í fjárlagafrumvarpinu til að standa fyrir framkvæmdum sem eru ekki arðsamar og því miður eru göngin sem á að fara í ekki með þeim hætti þannig að það þarf fjárauka til þess að setja viðbótarpeninga í það. Mig langar að spyrja hæstv. ráðherra: Þegar menn hækka komugjald á heilbrigðisstofnanir, heilsugæsluna, um 100% og breyta lyfjaflokkun þannig að sjúklingar borga meira en 500 milljónum meira; og þegar við breytum sjúkraþjálfarakerfinu þannig að sjúklingar borga 1,2 milljarða meira — hvernig breytist kostnaðarhlutdeild sjúklinga í heilbrigðiskerfinu á vakt Samfylkingarinnar? Hvernig hjálpar það til við að létta þrýstingi af heimilunum að frysta barnabætur og hafa sömu upphæð og árið 2025 þegar allt annað hækkar um 5,2%? Hvernig léttir það þrýstingi af heimilunum?