fjárlög 2027 Frú forseti. Ég þakka spurninguna. Það er þannig að frumvarpsgerðin er á lokametrunum, að mér skilst, og það er ekki langt í að frumvarpið í heild sinni verði birt þannig að þá mun þetta koma í ljós. En við höfum farið af stað með þau prinsipp sem ég get lýst hér sem snúa að því að það er vilji til þess að leggja gjald á aðila sem eru ekki með heimilisfesti hér á Íslandi til þess að greiða sérstaklega fyrir aðgengi að náttúruperlum. Við erum með alls konar tækni í dag sem gæti gert fólki kleift að greiða slíkt gjald. Fólk fer í strætó erlendis án þess að vera með miða nema rafrænt og borgar fyrir fram. Eftirlit er með ýmsum hætti. Þetta er bara þekkt í nútímanum. Það er hægt að greiða svona gjald með nútímatækni þannig að þetta mun koma í ljós á næstu dögum og ég hygg að fólk taki vel í þetta. En varðandi Þingvallaþjóðgarð. Ég verð bara að fá að fletta þessu sérstaklega upp fyrir hv. þingmann. Það er ekki að verða nein stefnubreyting, get ég sagt þér. Ég á allt eins von á að þetta snúi bara að einhverju sérstöku verkefni. Það er a.m.k. ekki að verða stefnubreyting þarna á. En ef það verða breytingar á gjaldtökunni á Þingvöllum þá þarf auðvitað að passa upp á það og ríkið mun passa upp á það að Þingvellir muni áfram fá þær tekjur sem þeir fá í dag með einum eða öðrum hætti. Við munum áfram standa með uppbyggingunni þar.