fjárlög 2027 Virðulegi forseti. Það var ekkert virkt samtal í gangi fram að þjóðaratkvæðagreiðslu. Svo var verið að spyrja þjóðina: Eigum við að hefja samningaviðræður á ný? Þjóðin svaraði nei. Það er ekki spurningin. Þjóðin svaraði nei. Þá er ástandið bara óbreytt. Það er hins vegar alveg ljóst að ef stjórnarandstaðan vill koma með einhverjar tillögur í þessa veru þá gerir hún það. Það er hins vegar ekki meiri hluti í þinginu fyrir málinu og mér finnst það áhugavert ef stjórnarandstaðan ætlar að beina kröftum sínum í þetta í staðinn fyrir að hugsa hvernig hagsmunum Íslands er best borgið núna þegar við erum að fara í ýmis mál eftir þjóðaratkvæðagreiðslu. Það er ákall mitt til stjórnarandstöðunnar: Komið þið í almennilega hagsmunagæslu með okkur, standið vörð um EES-samninginn, farið í það að styrkja varnar- og öryggishluta, bæði innan NATO og í tvíhliða samskiptum við hin ýmsu ríki, sem við erum að gera. Komið og horfið með okkur til framtíðar en verið ekki föst í þessum hjólförum.