fjárlög 2027 Forseti. Ég þakka hv. þm. Eydísi Ásbjörnsdóttur fyrir góðar spurningar sem koma í mjög góðu framhaldi af fyrra samtali við hv. þingmann. Við búum einmitt yfir svo miklum tækifærum og það er svo mikilvægt að reyna að ná utan um þetta heildstætt. Við höfum, eins og ég kom inn á í ræðunni, sett 630 millj. kr. í neytendamarkaðssetningu í ár og í fjárlagafrumvarpi næsta árs er gert ráð fyrir 330 millj. kr. Í framhaldi er síðan með náttúru- og innviðagjaldi búist við að skapist líka svigrúm til að halda þeirri markaðssetningu áfram vegna þess að ferðaþjónustuaðilar hafa gagnrýnt hvað okkur er tamt að taka þessi mál með áhlaupi, þ.e. fara í átak og svo að missa boltann og fara í átak og missa boltann meðan samkeppnislönd okkar eru miklu jafnari í sinni vinnu. Þetta á sannarlega ekki bara við um ferðaþjónustuna. Þetta virðist einhvern veginn vera okkur í blóð borið. Þetta erum við að reyna að jafna út, þ.e. vera með stöðuga markaðssetningu, m.a. til að reyna að jafna út þessar árstíðasveiflur. Það verður að segjast eins og er að þeir staðir á Íslandi sem finna mest fyrir því þegar fjöldi ferðamanna fellur niður eru staðir sem eru fjærst þéttbýlissvæðunum. Það er markmiðið. Það er lykilmarkmið okkar. Það er auðvitað ekki gert þannig að við segjum ferðamanninum hvert hann á að fara en við getum búið til aðlaðandi staði. Við getum hvatt ferðamenn til þess með markaðssetningu og markvissri uppbyggingu innviða, t.d. með því að nýta tæki eins og Framkvæmdasjóð ferðamannastaða. Á síðasta ári setti ég öryggið á oddinn við umsóknir og úrvinnslu umsókna en ég hef gefið það út að núna verði áherslan á dreifingu ferðamanna á þessi köldu svæði þannig að einhvern veginn verður reynt að meta þetta þannig að í úthlutuninni, sem eru einhverjar 800 millj. kr. sem við höfum, verði fókuserað á þessa minna sóttu staði, vegna þess að það hjálpar öllum. Það er gríðarlega mikilvægt fyrir þessa staði, fyrir uppbyggingu á þessum stöðum og líka til að minnka álagið á þá staði sem búa núna við gríðarlega mikið álag. Þetta er, ef ég leyfi mér að sletta sem ég veit að mér er bannað að gera en ætla samt að gera það, „win-win“ fyrir okkur öll að ná þessu markmiði og ég tel að við þurfum að sameinast um það. Ég er líka með í smíðum frumvarp sem lögfestir flugþróunarsjóð, svo dæmi sé tekið. Um þann sjóð eru ekki til lög. Þetta er allt liður í þeirri vegferð.