fjárlög 2027 Virðulegi forseti. Ég vil þakka hæstv. ráðherra fyrir svarið. Skólakerfið er einn samhangandi vefur. Háskólinn er ekki eyland. Það eru aðeins þrír sólarhringar síðan við fengum PISA-niðurstöðurnar sem sýna gríðarlega alvarlega stöðu. PISA mælir lesskilning, stærðfræði og vísindi og við þurfum einmitt að fjölga kennurum á þeim vettvangi. En það sem slær mann sérstaklega er hversu fáir afburðafærir eru í STEM-hlutanum. Það virðist sem ríkisstjórnir Norðurlandanna skilji málið og alvarleikann, enda hafa verið haldnir fundir þar sem fleiri ráðherrar ríkisstjórnarinnar koma saman og eru að skipuleggja aðgerðaáætlanir inn í næstu ár. Þess sér ekki merki hjá ríkisstjórn Íslands. Hæstv. mennta- og barnamálaráðherra hefur einn sést á vettvangi. Aðrir hafa dregið sig í hlé og verið í leyni. Því langar mig að spyrja hæstv. háskólaráðherra: Hvað ætlar hann að gera með tilliti til þeirrar niðurstöðu sem við fengum núna á þriðjudaginn í sínum málaflokkum til að bæta þessa stöðu, þar sem hann hefur með kennaramenntun að gera?