fjárlög 2027 Virðulegur forseti. Ég á sjálfur að baki feril í fjölmiðlum. Ég klóra mér oft í kollinum yfir niðurstöðum traustsmælinga. Það eru ýmsar kenningar í fjölmiðlafræðunum um það hvað drífur fólk til að lýsa trausti til hinna ýmsu miðla. Sumir segja að það séu miðlarnir sem síst rugga bátnum sem fái traust, það séu miðlarnir sem hafi e.t.v. minni áhrif en aðrir miðlar sem fái þennan stimpil um traustið. Þetta með spurninguna um traustið í þessum könnunum til almennings — mér hefur stundum fundist alla vega tilefni til að gaumgæfa það betur hvað við eigum við þegar við svörum svona spurningum en það er kannski önnur saga. Hæstv. ráðherra lýsti því að þetta sé þá áfram sýnin, að halda áfram að gefa í gagnvart RÚV og talar um þetta hlutverk gagnvart lýðræðinu. Ég hef bent á að ef mönnum væri alvara með það að aðkoma ríkisins að fjölmiðlum í landinu ætti að vera einhvers konar lýðræðislegt fyrirbæri þá myndu menn leyfa því að gerast á lýðræðislegum grunni, þ.e. að einstaklingar sem greiða þessa nauðungaráskrift til ríkisvaldsins fái að ráða einhverju um það hvert þeim fjármunum er ráðstafað, þ.e. til hvaða miðla en ekki allt á sama miðstýrða staðinn sem rekur ákveðna pólitík í mörgum málum. Hefur hæstv. ráðherra enn í hyggju að leyfa almenningi ekki að ráðstafa, þó ekki væri nema hluta þessa áskriftargjalds til ríkisins, til þeirra miðla sem þeir velja?