fjárlög 2027 Virðulegur forseti. Já, þetta er alveg rétt hjá hv. þingmanni; forgangsröðun og skilgreining á árangri eru auðvitað alveg lykilatriði, ekki síst þegar fé er í rauninni alltaf af skornum skammti. Það kemur líka fram hjá hv. þingmanni að við erum sammála um að það þurfi að útskrifa fleiri nemendur úr framhaldsskólum, t.d. í þessum mikilvægu STEM-greinum. Við erum að mennta mjög marga kennara. Að hluta til er vandamálið að við erum að mennta kennara sem vinna svo ekki við kennslu, þannig að það er ekki nóg að fjölga bara þar. Reyndar sýndi skýrsla, sem við eigum inni á okkar borði, eða minnisblað, mig minnir að OECD hafi meira að segja tekið undir það, að þessi aðgerð sem farið var í fyrir fjórum, fimm árum hafi ekki skilað því sem til var ætlast og var ekki ráðlagt að fara þá leið. Ég held að þetta sé samspil margra þátta. Í fyrsta lagi þarf að gera menntun kennara góða og það þarf að bæta það sem upp á vantar þar, alveg örugglega að fjölga kennurum sem eru sérmenntaðir í að kenna þessar greinar sem við viljum svo gjarnan leggja áherslu á, eins og lestur, stærðfræði og annað. En við þurfum að bæta starfsumhverfi þeirra og það er hægt að gera á margvíslegan hátt. Laun hafa verið nefnd, virðing fyrir stéttinni og starfsaðstæður inni í skólunum. Allt þetta þarf að koma til. En ég bind a.m.k. miklar vonir við að þessi úttekt sem verið er að gera á kennaranámi geti orðið okkur leiðarljós til næstu skrefa vegna þess að það er fyrst og fremst það sem við þurfum, að þeir kennarar sem við menntum njóti sín í kennslunni, séu mjög vel hæfir til að kenna, sem þeir eru auðvitað allflestir, og að þeir haldist í kennslu og sjái sér hag í því að vinna við það sem þeir menntuðu sig til. Það er kannski raunverulega stóra vandamálið í dag.