fjárlög 2027 Virðulegur forseti. Við erum enn þá að auka fé til viðhalds. Við erum að fullfjármagna vetrarþjónustu og við erum að halda sjó í almenningssamgöngum. Það eru engin verkefni sem frestast, svo það liggi skýrt fyrir. Það sem við erum að gera miðað við síðustu ríkisstjórn er að árið 2024 voru þau að leggja 12,8 milljarða kr. til viðhalds vega. Núverandi ríkisstjórn bætti 3 milljörðum við síðasta sumar. Í ár erum við að fara í 17, 5 milljarða í heild. Næsta ár erum við að fara í 17,6 milljarða í viðhaldi. Framkvæmdin er samkvæmt samgönguáætlun. Fyrri ríkisstjórn var með áætlað að fara í 261 milljarða kr. á fyrstu fimm árum þeirrar tillögu sem þau lögðu fram árið 2023. Við erum að fara í 351 milljarða í framkvæmdafé samkvæmt samgönguáætlun, hækkun um 90 milljarða. Vetrarþjónustu líka. Það var veruleg vanfjármögnun þar. Við erum að setja tæpum 14 milljörðum meira í það á fyrsta tímabilinu. Jarðgöng; það hafa ekki verið grafin ein einustu jarðgöng síðan 2017 með Dýrafjarðargöngum. Þeim jarðgöngum var lokið árið 2020. Við erum að fara að hefja jarðgangaborun á næsta ári og ég býð hv. þingmann innilega velkominn við þá opnun. Við erum svo sannarlega að fara að fjármagna til framtíðar með innviðafélaginu þannig að við erum klárlega að standa okkar plikt hvað þetta varðar miðað við fyrri ríkisstjórn. Munurinn núna á milli ára í viðhaldi er að fara upp í 17,6 milljarða. Við hefðum gjarnan viljað fara hærra en það er aðhald í gangi og við ætlum að slá niður verðbólgu.