fjárlög 2027 Virðulegi forseti. Varðandi Vegagerðina og Göng og brú þá eru samskipti þar gríðarlega mikilvæg. Vegagerðin mun enn þá gegna lykilhlutverki í samgönguframkvæmdum og það er eigandi að öllu samgöngukerfinu og allra samgöngumannvirkja og er veghaldari á öllum vegum landsins. Göng og brú er viðbót og verkefni sem fara þar inn verða unnin þar og það léttir á verkefnastöðu hjá Vegagerðinni, hún getur sinnt betur þeim verkum, tekið að sér önnur verkefni eða flýtt þeim verkefnum sem þar eru. Fjármögnunin á Göngum og brú á að vera sjálfbær og það segir t.d. beinlínis með Sundabraut að hún á að vera greidd af veggjöldum. Það er ekki ætlast til þess að ríkið sé að greiða það. Við getum tekið fleiri mannvirki sem geta staðið undir sér. Við erum að taka eitt verkefni sem stendur ekki undir sér og þá þarf ríkið að koma inn með eigið fé til að tryggja það. Þannig að þetta er viðbót við núverandi kerfi þar sem Vegagerðin sér um allar framkvæmdir og við bindum miklar vonir við þetta. En þetta félag þarf að sjálfsögðu að þroskast og fara hægt af stað eins og öll önnur félög og sjá hvað verður. Varðandi jöfnunarsjóð þá er kerfið núna einfaldara. Það hefur verið reynt margoft að koma með frumvörp um jöfnunarsjóð. Okkur tókst að samþykkja frumvarp á síðasta vori og líkanið á að vera einfaldara og réttlátara. Vissulega getur vel verið að það séu ákveðin vandamál á einhverjum svæðum og við getum skoðað það, svo sannarlega. Sum sveitarfélög voru að fá stóran hluta tekna sinna frá jöfnunarsjóði. En við getum farið alveg sérstaklega yfir það. Ég hef þær upplýsingar beint úr ráðuneyti mínu að þetta hafi gengið vel. Forseti beinir því til hv. þingmanna og hæstv. ráðherra að virða ræðutíma.