fjárlög 2027 Frú forseti. Aftur þakka ég hæstv. innviðaráðherra fyrir yfirferðina hér áðan. Mig langar í þessu seinna innleggi mínu að ræða aðeins við ráðherrann um farnetsþjónustumálin. Ég hef í nokkur skipti tekið þessi mál upp við ráðherrann en það eru miklar áhyggjur og óþægindi, og raunar hefur skapast hættuástand á landsbyggðinni, vegna útfösunar 2G og 3G fyrir 4G og 5G. Það var sammerkt með þeim sem komu fyrir umhverfis- og samgöngunefnd á síðasta þingvetri að þeir höfðu þungar áhyggjur af verri tengingum sem skapar óöryggi og raunar hættuástand. Ég vil spyrja hæstv. ráðherra: Af hverju var svo nauðsynlegt að slökkva á 2G og 3G um leið og 4G og 5G var innleitt með öllum þeim óþægindum, óöryggi og hættuástandi sem slíkt hefur haft í för með sér, sérstaklega fyrir hinar dreifðu byggðir landsins? Af hverju eru nú fleiri holur í dreifikerfinu en áður? Og það sem meira er: Hvers vegna fylgdi aldrei fyrri svörum ráðherra að Ísland væri fyrst Evrópuþjóða að slökkva alveg á 2G og 3G? Hvers vegna? Hvers vegna var þessi ákvörðun tekin um útfösunina og hvers vegna var undirbúningurinn ekki vandaðri en raun ber vitni? Sé svarið sem ég mun fá hér á eftir þess eðlis að þetta sé viðskiptaleg ákvörðun, að þetta sé viðskiptalegs eðlis, þá er það svar fullkomlega óviðunandi. Þetta er fyrst og síðast öryggismál og slíkar ákvarðanir eru ekki teknar á viðskiptalegum grunni. Ráðherra hefur svarað því til að þetta verði lagað á kjörtímabilinu. Það svar er einnig óboðlegt nema ríkisstjórnin sé hreinlega að fara frá í dag eða á morgun. Þetta er óboðlegt svar fyrir þær byggðir og þá íbúa landsins sem nú búa við óöryggi og ná sumpart ekki í 112.