fjárlög 2027 Frú forseti. Ég þakka hæstv. ráðherra fyrir svörin. Já, ákvörðun var tekin árið 2022 af fjarskiptafyrirtækjum. Ákvörðun um þetta er viðskiptalegs eðlis. Þetta er fullkomlega fáránlegt. En ég fékk ekki svör við því hvers vegna Ísland var fyrst Evrópuþjóða til að slökkva alveg á 2G og 3G. Hvers vegna var Ísland fyrst þjóða til þess? Mér þætti vænt um að fá svör við því. Mig langaði aðeins að ræða ferjumálin. Það kom upp erfið og alvarleg staða í sumar vegna skyndilegs brotthvarfs Baldurs úr þjónustu á Breiðafirði og hafði það veruleg áhrif á samgöngur, ferðaþjónustu og atvinnurekstur á svæðinu á viðkvæmum tíma. Við sem komum að þessu máli með einum eða öðrum hætti erum sammála um að það sé nauðsynlegt að koma í veg fyrir að slíkt komi upp aftur og ég veit að ráðherra er sama sinnis. Ég veit alveg fullkomlega að hann er sama sinnis. Þess vegna vil ég spyrja ráðherra hvernig hann hyggst fyrirbyggja að viðlíka aðstæður komi upp aftur. Þessu tengt langar mig að spyrja: Er Herjólfur III, gamli Herjólfur, orðinn haffær? Það skiptir líka máli í þessu samhengi.