fjárlög 2027 Frú forseti. Fjárlög ársins 2027 marka ákveðin tímamót. Nú er stefnt að hallalausum fjárlögum en í tæpan áratug hefur framtíðin verið tekin að láni. Það er af ástæðu að hallalaus fjárlög hafa ekki verið niðurstaðan árum saman. Það er vegna þess að verkefnið er erfitt. Það kallar á aðhald og það kallar á skýrari forgangsröðun. Heildarfjárframlög sem heyra undir dómsmálaráðuneytið eru 79,4 milljarðar. Það jafngildir um 4,5% af áætluðum heildarútgjöldum ríkissjóðs sem nema alls um 1.765 milljörðum. Öryggi almennings er frumskylda ríkisins og þess vegna er minni aðhaldskrafa til lögreglu, ákæruvalds og dómstóla en í mörgum öðrum málaflokkum. Stærstu málaflokkarnir og umfangsmestu fjárfestingarnar eru á sviði öryggismála. Þar vega þyngst lögregla, landhelgisgæsla og fangelsi. Fjárheimildir til þessara verkefna nema rúmum 52 milljörðum á næsta ári. Á síðasta ári styrktum við þessa málaflokka varanlega og verulega. Varanleg framlög til Landhelgisgæslu Íslands voru aukin um 1,3 milljarða. Um 1,2 milljarðar fóru til lögreglu vegna fjölgunar lögreglumanna og um 230 milljónir til Fangelsismálastofnunar. Það skiptir máli að þessi auknu framlög eru varanleg, þau halda sér í fjárlögum 2027 þrátt fyrir almennt aðhald. Þá liggur líka fyrir að Ísland hefur nú skuldbundið sig til að verja 1,5% af vergri landsframleiðslu í öryggis- og varnarmál. Ég ætla að leyfa mér að segja að fyrir herlausa þjóð þá liggur í mínum huga í augum uppi að fjárfest verði í að styrkja borgaralega innviði landsins, landhelgisgæslu og einingar eins og sérsveit, greiningardeild og almannavarnir. Forseti. Aðhald í þessu frumvarpi á ekki að bitna á grunnþjónustu í framlínu. Við leitum fyrst hagræðingar í stjórnsýslu og skipulagi. Fyrr á árinu var t.d. samþykkt frumvarp um að sameina níu sýslumannsembætti í eitt. Það var mál sem snerist um minni yfirstjórn, betri þjónustu og betri meðferð fjármuna. Á haustþingi legg ég fram frumvarp um mestu skipulagsbreytingar á lögreglu í áratug. Með stærri og öflugri lögregluembættum byggjum við upp meiri getu löggæsluliðsins á landinu öllu. Markmiðið þar er ekki hagræðing hagræðingarinnar vegna heldur öflugri löggæsla. Samhliða verður kynnt ný löggæsluáætlun til næstu fimm ára en sú síðasta rann út árið 2023. Þannig höfum við um nokkra hríð verið án stefnu í þessum efnum. Nú mótum við skýra stefnu í löggæslumálum til að mæta áskorunum næstu ára. Virðulegi forseti. Aðeins um fangelsismál en þar verða stigin stór skref í ár. Undirbúningur að byggingu fyrsta öryggisfangelsis landsins gengur vel og við erum búin að fjármagna að fullu 1. áfanga. Í fjárlögum 2027 er gert ráð fyrir 3,9 milljörðum vegna framkvæmdanna. Þannig erum við í góðu færi til að fara vel af stað með þetta verkefni. Við erum líka að undirbúa uppbyggingu björgunarmiðstöðvar í Skógarhlíð og stefnum að því að ljúka verkefninu á fyrri hluta næsta árs. Á málefnasviði réttinda einstaklinga, trúmála og stjórnsýslu eru heildarútgjöld um 20 milljarðar. Hér undir falla m.a. útlendingamál en einnig málaflokkarnir sýslumenn og trúmál. Fjárveiting dómsmálaráðuneytisins til útlendingamála á næsta ári eru rúmlega 2,4 milljarðar og þar er þess vegna gert ráð fyrir lækkun um 34% á milli ára. Það er lækkun sem um munar. Við höfum þegar séð verulegan árangur af þeim breytingum sem ráðist hefur verið í og það er að skila sér í minni útgjöldum. Á tímabilinu 2023–2025 hefur umsóknum um alþjóðlega vernd fækkað um 58% og langstærsti hluti umsækjenda nú er fólk frá Úkraínu. Á sama tíma hafa heildarútgjöld til útlendinga lækkað um rúma 4 milljarða eða 20%. Ég ætla að nefna hér í lokin mikilvægan áfanga sem hefur náðst hvað varðar sóknargjöld. Framlag til sóknargjalda hækkar varanlega um 200 milljónir og með því tryggjum við fyrirsjáanleika og stöðugleika um fjármögnun þeirra. Ég ætlaði að nefna hérna líka stuttlega framlög til jafnréttis- og mannréttindamála sem nema um 400 millj. kr. Þetta er það helsta frá dómsmálaráðuneytinu og ég hlakka til umræðunnar við þingmenn hér á eftir.