fjárlög 2027 Virðulegi forseti. Ég þakka hæstv. ráðherra fyrir skýr svör og tek undir ánægju hæstv. ráðherra ef rétt reynist varðandi sóknargjöldin. Við ræðum skaðabótalögin kannski betur og ég mun fylgja því eftir. En svo að ég skilji hæstv. ráðherra: Er hæstv. ráðherra tilbúinn að koma með okkur sem erum þeirrar skoðunar að það verði að skoða þessi mál, bæði hver framkvæmdin var og, jú, aðdragandinn? En aðalatriðið er að við komum með einhverjar niðurstöður sem við getum lært af. Mér finnst augljóst að við eigum og verðum að gera það. Skil ég það rétt að hæstv. ráðherra sé tilbúinn að fara í þá vinnu? Ég vona að svo sé og mér fannst ég heyra það á hæstv. ráðherra. Ég held að það væri mjög skynsamlegt ef hæstv. ráðherra myndi vera með og helst hafa forystu um slíkt því að þetta mál fer ekki frá okkur. Auðvitað þarf að vanda til verka. Ég skil að hæstv. ráðherra hafi talað með þeim hætti og ég tek undir það. En er það rétt að hæstv. ráðherra sé tilbúinn að beita sér fyrir því að við rannsökum þessi mál til að læra af þeim?