fjárlög 2027 Virðulegur forseti. Mig langar að koma inn á málefni flóttafólks og útlendinga. Ég hef starfað við málaflokkinn hjá Útlendingastofnun og síðar haft aðkomu að málaflokknum í starfi sveitarstjóra í samfélagi sem hefur tekið á móti flóttafólki. Ég þekki þetta því ágætlega, bæði stjórnsýsluna og þau áhrif sem móttaka fólks hefur á nærsamfélagið. Mér er sérstaklega hugleikin koma flóttafólks frá Úkraínu og fagna því að hæstv. dómsmálaráðherra boðar frumvarp þar sem hámark tímabundinnar verndar verður lengt úr fimm árum í sex ár. Þannig myndi Ísland fylgja öðrum Evrópuríkjum í þessum málum. Það væru köld skilaboð ef skyndilega ætti að enda dvalartíma fólks frá Úkraínu eins og ástandið er heima fyrir. Virðulegur forseti. Hins vegar er einnig mikilvægt að úrræðið tímabundin vernd sé einmitt tímabundið úrræði. Í boðuðu frumvarpi er því lagt til að sérstök heimild til mannúðarleyfis að lokinni tímabundinni vernd falli brott. Þess í stað geti fólk sem fékk tímabundna vernd, eins og aðrir útlendingar, sótt um dvalarleyfi að henni lokinni á þeim grundvelli sem endurspeglar raunverulega stöðu þess hér á landi, t.d. vegna atvinnu, náms eða fjölskyldutengsla. Þetta finnst mér skynsamleg nálgun. Stór hluti þeirra Úkraínumanna sem hingað hefur komið hefur fótað sig vel í íslensku samfélagi. Um það þekki ég sjálfur nærtæk dæmi. Margir hafa farið beint út á vinnumarkaðinn, stundað nám, tekið virkan þátt í samfélaginu og fest hér rætur. Við þær aðstæður er eðlilegt að þeir sem vilja búa hér áfram og uppfylla skilyrði laganna geti byggt umsókn um dvalarleyfi á stöðu sinni og þeim tengslum sem þeir hafa raunverulega myndað við íslenskt samfélag. Um leið þarf lagaumgjörð útlendingamála að vera skýr, skilvirk og fyrirsjáanleg. Það varðar ekki aðeins einstaklingana sem um ræðir heldur líka meðferð opinberra fjárheimilda. Skýrari reglur og skilvirkari málsmeðferð eiga að draga úr óþarfa töfum og kostnaði og tryggja að fjármunir nýtist þar sem þeirra er þörf. Það á vel við þegar við ræðum fjárlög ríkisins. Við þurfum að geta veitt þeim vernd sem á henni þurfa að halda en jafnframt tryggt að kerfið sé sjálfbært, skilvirkt og að stjórnvöld hafi góða stjórn á málaflokknum. Mig langar því að spyrja hæstv. dómsmálaráðherra: Hver telur hún að séu mikilvægustu skrefin sem þegar hafa verið stigin til að ná betri stjórn á útlendingamálum? Hver eru mikilvægustu næstu skref í þeirri vinnu?