fjárlög 2027 Virðulegur forseti. Ég þakka hæstv. dómsmálaráðherra fyrir skýr svör. Mér fannst ekki alveg koma fram varðandi það hvernig við sjáum það fyrir okkur að reyna að fylla upp í þessi stöðugildi vegna þess að það er líka náttúrlega leki á hinum endanum, lögreglumenn eru að hætta vegna aldurs og alls konar ástæðna. Það er því mikil þörf á mannskap á hverju ári í lögregluna bara út af náttúrulegum aðstæðum, ef það má kalla það svo. Ég held því að það sé mjög mikilvægt að við setjum einhverja markvissa vinnu í gang hvað það varðar. Mig langaði að spyrja sérstaklega hér í lokin aftur varðandi sérsveit ríkislögreglustjóra, hvort hæstv. dómsmálaráðherra myndi taka því óstinnt upp ef fjárlaganefnd myndi taka þetta til skoðunar inni í nefnd og í vinnu nefndarinnar í vetur.