fjárlög 2027 Virðulegur forseti. Ég þakka hæstv. ráðherra fyrir ræðuna. Þetta hefur kannski ekki verið mjög skemmtileg umræða, alvarleg, og svo kemur hæstv. ráðherra með gamanmál. Takk fyrir það. Þetta var mjög frískandi. Náttúrlega algerlega galið það sem hæstv. ráðherra var að segja og algerlega nýtt að eigna sér vaxtalækkun þegar Samfylkingin byrjaði í kosningabaráttu. Fyrirgefðu, sleggjan hefur ekki virkað. — Virðulegi forseti, er hægt að láta hæstv. ráðherra slaka á eða? Forseti biður um hljóð í salnum. Að það séu ekki samtöl. Þessi ríkisstjórn hefur náttúrlega bara verið í því að hækka vexti, hafa ekki gert neitt með ábendingar faglegs fjármálaráðs, hækkað ríkisútgjöld sem aldrei fyrr og hækkað skatta um 60 milljarða, en látum það liggja milli hluta. Ég ætla að spyrja hæstv. ráðherra út í það sem hann talaði alls ekki um, sitt málefnasvið. Enn ein skattahækkunin er sú að fara í svokallaðan náttúrupassa og ég held að það eigi að ná einhverjum 6 milljörðum þar. Markmiðið, eins og ég skil það og hefur verið kynnt fyrir almenningi, er að bæta innviði á ferðamannastöðum, friðlýstum svæðum og þjóðgörðum. Menn hafa undanfarin ár verið með sértekjur á þessum svæðum og hugmyndin er sú að þeir sem nota þjónustuna greiði. Til að setja það í eitthvert samhengi, virðulegi forseti, þá hefur þetta farið úr kannski 200 millj. kr. 2021 í rúmlega 2,2 milljarða ef marka má fjárlögin núna og ríkisstjórnin er að bæta í þessar sértekjur, bæði í síðasta fjárlagafrumvarpi og núverandi til þess að fjármagna þessa starfsemi. Þetta eru tveir skólar, annaðhvort lætur þú þann sem notar borga eða þú ferð í almenna skattlagningu, en nú ætlar ríkisstjórnin að halda áfram í þessum sérstöku gjöldum, sem ég tel vera skynsamlegt, en ætlar síðan að bæta náttúrupassanum ofan á. Virðulegur forseti. Hvernig getur þetta gengið eftir? Hvað ætla menn að ganga langt í þessu, annars vegar í gjöldunum á þeim sem nýta þetta, sem er stóraukning á milli ára miðað við þetta frumvarp og það síðasta, og síðan að koma með annan skatt í ofanálag til að gera sama hlutinn?