fjárlög 2027 Virðulegi forseti. Ég vil þakka hv. þingmanni fyrir andsvarið og það er gott að geta lífgað aðeins upp á andrúmsloftið hér í þessum sal. Hv. þingmaður spyr um náttúru- og innviðagjaldið. Ég held að það sé löngu tímabært að framkvæma þetta. Þetta er auðvitað aðgerð sem er á ábyrgð atvinnuvegaráðuneytisins en þau hafa unnið þetta vel með okkur. Eins og hv. þingmaður þekkir væntanlega þá stendur ekki til að náttúru- og innviðagjaldið taki til allra náttúruperlnanna, það stendur ekki til að það taki til allra þeirra svæða sem t.d. í dag er verið að rukka bílastæðagjöldin inn á, þannig að það skýrir kannski það sem hv. þingmaður minntist á varðandi það að það er áfram gert ráð fyrir ákveðnum sértekjum vegna friðlýstra svæða og þjóðgarðanna vegna þess að sumir þeirra standa utan gildissviðs náttúru- og innviðagjaldsins.