fjárlög 2027 Virðulegur forseti. Ég vil þakka hv. þingmanni fyrir þessa fyrirspurn. Eins og kemur fram í frumvarpi til fjárlaga þá hækkar fjárheimildin sem ber heitið Náttúruvernd, skógrækt og landgræðsla um 228 millj. kr. vegna tímabundinna verkefna. Þar vegur þungt styrking átaks til endurheimtar á ríkisjörðum. Það er gaman að segja frá því að þar erum við að fara að taka fyrstu skóflustunguna 24. september. Við viljum auðvitað að aukið fjármagn skili mælanlegum árangri og þá þjónar Land og skógur mjög mikilvægu hlutverki. Þar hefur líka verið unnið mjög þétt að vottunarkerfi sem ég tel að geti skapað skýrari og sterkari hvata, m.a. fyrir bændur en líka félagasamtök til að koma inn í þessi mál. En ég vil líka vekja athygli á nýju styrkjakerfi þar sem félagasamtök, sveitarfélög, bændur og fyrirtæki geta sótt um styrki til að endurheimta votlendi, endurheimta vistkerfi. Ein af nýlundunum þar er líka að við erum með sérstaka verndun kolefnisríkra vistkerfa inni í þessu. Það er því mjög margt spennandi í gangi í þessum málaflokki. Illu heilli hefur lítið votlendi verið endurheimt á síðustu árum en hið opinbera er að ganga fram með góðu fordæmi þegar kemur að ríkisjörðunum og þar sjáum við fyrir okkur að ná árangri strax á yfirstandandi ári sem mun þá líka koma fram í losunartölum Íslands.