fjárlög 2027 Frú forseti. Ég vil þakka hæstv. umhverfis-, orku- og loftslagsráðherra fyrir hans ræðu hér áðan, eldræðu. Mig langar sérstaklega að ræða við ráðherrann um eitt mál á hans málefnasviði. Það er ETS2 og ef ég kemst inn í CBAM langar mig aðeins að spjalla um það líka. Það er þekkt að ETS-kerfið hefur reynst íþyngjandi fyrir Ísland. Þessi innleiðing viðskiptakerfis eða skattakerfis ESB með losunarheimildir hefur þegar haft veruleg áhrif á íslenskt atvinnulíf og samkeppnishæfni landsins. Þetta er alveg þekkt staða og í raun og veru held ég að hún sé óumdeilanleg að einhverju leyti, alla vega. Ég sé núna á þingmálaskrá að það stendur til að innleiða ETS2-kerfið, því miður, og mig langar þess vegna að víkja að ETS-kerfinu og síðan ETS2-kerfinu sem nú á greinilega að innleiða. Mér finnst skipta máli að menn svari því í raun hvaðan þessar kvaðir sem fylgja ETS-kerfinu, sem er viðskiptakerfi Evrópusambandsins, koma í raun og veru. Við erum ekki í Evrópusambandinu, hafi menn ekki tekið eftir því, og það sem meira er, þjóðin hafnaði því fyrir nokkrum vikum að hefja aðlögunarviðræður á ný um aðild að Evrópusambandinu. Við erum hins vegar í EES og umhverfismálin eru hluti af EES-samningnum en það liggur þó fyrir hreint og klárt að skattamál eru ekki hluti af EES og ETS-kerfið er öðrum þræði skattamál og er sniðið að meginlandi Evrópu. Það er verið að leggja á gjöld og innheimta skatta með þessu kerfi. Hvernig varð þetta viðskiptakerfi ESB með losunarheimildir hluti af EES-samningnum? Mig langar líka að vita hvort t.d. Ísland hafi verið þvingað inn í þetta skattasamstarf vegna þess að skattamál eru ekki hluti af EES. Síðan langar mig að endingu að spyrja ráðherra: Telur hann koma til greina að Ísland hreinlega segi sig frá þessu ETS-kerfi, ekki síst eftir að nú virðist ljóst að ESB ætlar bara að gefa í?