fjárlög 2027 Virðulegur forseti. Ég verð að viðurkenna að ég var aðeins að stríða hv. þingmönnum þegar ég kallaði þetta skattalækkun. Ég biðst velvirðingar á því. Ég skal ekki sýna þessa léttúð það sem af er þessari umræðu. En það sem ég var auðvitað að vísa til er að í fjármálaáætlun síðustu ríkisstjórnar var gert ráð fyrir miklu harkalegri gjaldtöku af ökutækjum og vegna ökutækja og aksturs heldur en hefur verið skrifað inn í t.d. þau fjárlög sem núna eru til umræðu og fjármálaáætlun núverandi ríkisstjórnar. Þannig að mér þætti gaman að heyra frá hv. þingmönnum stjórnarandstöðunnar, sem hafa jú farið stórum orðum um miklar skatta- og gjaldahækkanir o.s.frv., hvernig þau sáu fyrir sér að leysa þetta ef ekki með kílómetragjaldinu. Átti að hækka vörugjöldin enn þá meira? Átti að hækka gjöldin á dælunni enn þá meira? Það væri mjög forvitnilegt að heyra þetta.