fjárlög 2027 Virðulegi forseti. Hér er komið inn á margt. Ég held að það sé mikilvægt að rugla ekki saman orkunotkun og orkuframleiðslu. Við höfum verið að taka okkur á á síðustu árum þegar kemur að orkunotkun, t.d. í samgöngum, og ég held að það sé gríðarlegur ávinningur og ábati fólginn í því sem við getum kallað styrkara orkufullveldi, að við þurfum síður að reiða okkur á innflutt eldsneyti með öllum þeim sveiflum í heimsmarkaðsverði sem því fylgir. Þannig að hv. þingmaður hlýtur að vera sammála mér í því að orkuskipti skipta sannarlega máli að þessu leytinu til, bæði fyrir fyrirtæki og heimili. Það er til mikils að vinna þarna. Varðandi loftslagssamstarf Íslands og Evrópusambandsins eru þar auðvitað bæði áskoranir og tækifæri. Ég held að ETS-kerfið hafi að mörgu leyti verið mikilvægt fyrir iðnað á Íslandi og mikilvægt að vera inni í því rétt eins og það verður mikilvægt að vera inni í CBAM-kerfinu þegar það verður innleitt. Hvað ETS-kerfið varðar og stöðu Íslands í því þá höldum við auðvitað áfram að gera það sem við erum að gera, sem er einmitt það, eins og hv. þingmaður talaði um, að verja hagsmuni Íslands í loftslagssamstarfi. Leikreglurnar þurfa að vera sanngjarnar, það gengur ekki að refsa t.d. Íslandi fyrir fjarlægðir, fyrir landfræðilega stöðu okkar. Einmitt þess vegna sóttumst við eftir og fengum sérlausn þegar kemur að fluginu. Ég hefði viljað sjá sams konar leiðangur í skipaflutningum og þar erum við núna að beita okkur gagnvart Evrópusambandinu þegar kemur að endurskoðun ETS-kerfisins. En varðandi ETS-kerfið svona „prinsippelt“ þá get ég ekki fallist á að grunnhugmyndafræði þess sé röng eða slæm. En útfærslan skiptir máli og þar munu íslensk stjórnvöld halda áfram að beita sér af fullum þunga fyrir hagsmunum Íslands.