fjárlög 2027 Virðulegur forseti. Það er leiðinlegt að hlýða á hæstv. ráðherra sem hljómar hér eins og biluð plata. Leiðinlegt því að hann er ungur og nýkominn í pólitík og hann á ekki að hljóma eins og biluð plata á fyrstu metrum síns stjórnmálaferils. Það er rangt sem hann segir að einhver árangur hafi orðið í orkuskiptum. Ég endurtek það sem ég sagði áðan: Það hafa engin orkuskipti orðið frá árinu 2010 til dagsins í dag. Orkuskiptin á Íslandi fóru fram fyrir áratugum. Við höfum náð þessum árangri sem önnur ríki eru að reyna að ná með orkuskiptaumræðunni allri. En mig langar að spyrja sérstaklega út í Orkusjóð og þann niðurskurð sem þar er sem hægt er að fagna. Ef ég skil fréttir rétt þá er hins vegar markmiðið, eða áform stjórnvalda um það, að ráðstafa hátt í 1,5 milljarði af því fé sem tekið er úr Orkusjóði til niðurgreiðslu til flugrekenda. Mér finnst það skjóta skökku við í ljósi þess að það hafa farið fréttir um einhverjar sérstakar sérlausnir fyrir Ísland þegar kemur að þessu ETS-losunarbixi öllu saman í fluginu. En er það rétt skilið? Á að fara að niðurgreiða núna þessa þátttöku í losunarheimildunum? Þá hlýt ég að spyrja: Út á hvað gengu þessar sérlausnir?