fjárlög 2027 Virðulegi forseti. Ég held að það sé full ástæða til að fara ofan í kjölinn á þessu. Það sem nýjustu tölur um nýskráningu fólksbíla segja okkur er að almenningur og fyrirtæki, þ.e.a.s. önnur en ökutækjaleigur, hafa verið að rafvæðast mjög hratt. Yfir 80% nýskráninga bifreiða á vegum þeirra eru rafbílar en sambærilegt hlutfall hjá ökutækjaleigum er 14%. Það er ákveðin aukning. En ef þetta er í alvörunni það sem stefnt var að með 10 milljarða kr. beinum og óbeinum útgjöldum úr ríkissjóði, þá er það auðvitað mjög slæm ráðstöfun á peningum. Þannig að ég tek undir það með hv. þingmanni að full ástæða er til að ráðuneytin og nefndir þingsins fari betur yfir þetta og þetta er eitt af því sem hefur verið til skoðunar hjá framkvæmdahópi orkuskipta sem er á vegum míns ráðuneytis, atvinnuvegaráðuneytisins og fjármálaráðuneytisins. Þannig að ég hvet til frekari umræðu um hvernig þetta gerist, að það fari 10 milljarðar kr. af almannafé til bílaleigufyrirtækja án þess að árangurinn þegar kemur að orkuskiptum sé meiri en raun ber vitni.