fjárlög 2027 Frú forseti. Ég vil byrja á því að fagna því að fá að heyra aðeins um verkefnalista hæstv. ráðherra vegna þess að þetta eru gríðarlega mikilvægar upplýsingar að fá fram hér, að við séum raunverulega að ráðast að þessum biðlistum. Það er, ætla ég að fullyrða, besta fjárfesting sem þetta samfélag getur farið í vegna þess að mannauðurinn okkar er það sem skiptir okkur öllu máli. Af því að hæstv. ráðherra vék hér aðeins að þjónustu úti á landi þá vil ég fagna því sérstaklega að það sé verið að færa þjónustuna nær fólkinu í staðinn fyrir að fólk sé stöðugt að fara til Reykjavíkur og sækja þjónustu sem getur bæði tekið mikinn tíma og orku af fjölskyldum sem eru kannski í greiningarferli. Að færa þjónustuna heim skiptir ofboðslega miklu máli og ég hvet hreinlega ráðherra til dáða að fylgja þessu fast eftir og láta verkin tala. Þetta eru gríðarlega mikilvæg mál vegna þess að við vitum að snemmtæk íhlutun skilar sér í bjartri framtíð og það er þangað sem við eigum að stefna. Ég er því í raun ekki með spurningu heldur bara að fagna því að hafa fengið þetta góða svar.