fjárlög 2027 Frú forseti. Aftur þakka ég hv. þingmanni góðar athugasemdir. Það er alveg rétt að meðferðir með lyfjum geta verið svokallaðar annars stigs forvarnir. Þegar við erum greind með blóðþrýstingsvandamál eða annað þá er afar mikilvægt að meðferð sé viðeigandi. Varðandi lyfjamálin þá eru þau mjög flókin. Ég hyggst t.d. ræða við Dani um hvort við gætum fengið að vera hluti af þeirra markaði. Síðan er annað í bígerð sem er að hætta að miða við lágmarksverð á Norðurlöndunum, sem var gert í Covid og gerir það að verkum að færri vilja koma inn á íslenskan markað. Nú hefur verið tekin ákvörðun og ég hef tilkynnt að þetta verður ekki lengur gert svona. Útfærslan er í gangi. Það er verðendurskoðun á tveggja ára fresti. Við erum að flýta þeirri næstu þannig að það er svo sannarlega vinna í gangi, bæði til að fá aðgengi að almennum lyfjum og svo eru líka þessi leyfisskyldu lyf sem við höfum oft rætt hérna.