fjárlög 2027 Virðulegi forseti. Ég vil þakka hæstv. ráðherra fyrir greinargóð svör. Það er alveg skýrt að því minni sem biðlistinn er, því betra aðgengi er að þjónustunni og betri þjónusta án efa. En mig langar að víkja nokkrum orðum að hagræðingunni. Heilbrigðis- og öldrunarstofnanir eru meðal þeirrar grunnþjónustu sem sérstaklega er leitast við að hlífa í fjárlagafrumvarpinu. Heilbrigðiskerfinu er engu að síður ætlað að leggja sitt af mörkum í hagræðingu, m.a. með hagkvæmum innkaupum og betri nýtingu fjármuna. Þá er kannski spurningin þessi: Hvernig sér hæstv. ráðherra fyrir sér að sú hagræðing náist án þess að hún komi niður á mönnun eða þjónustu við sjúklinga? Þarna er fín lína og þetta er viðkvæmur málaflokkur. Ég spyr um hagræðinguna og hvort hún geti mögulega komið niður á mönnun og þjónustu við sjúklinga.